ໃນຕອນບ່າຍຂອງວັນທີ 19 ມີນາ 2020, ທ່ານ ຄຳພອນ ວົງສັນຕິ, ກົງສຸນໃຫຍ່ ແຫ່ງ ສປປ ລາວ ທີ່ ນະຄອນຄຸນມິງ, ສປ ຈີນ, ໄດ້ຕາງໜ້າຜູ້ບໍລິຈາກ ເກືອບ 600 ກວ່າທ່ານ ມອບເງີນຊ່ວຍເຫລືອ ຈຳນວນ 28.000 ຢວນ (ປະມານ 36.400.000 ກີບ) ໃຫ້ແກ່ປະຊາຊົນ ແຂວງຢູນນານ, ສປ ຈີນ, ທີ່ໄດ້ຮັບຜົນກະທົບຈາກການລະບາດຂອງ ໄວຣັສໂຄວິດ-19 , ທີ່ ຫ້ອງການຕ່າງປະເທດ ແຂວງຢູນນານ, ສປ ຈີນ.

ໃນຕອນບ່າຍຂອງວັນທີ 18 ມີນາ 2020, ເວລາ: 14:00, ຢູ່ທີ່ກະຊວງການຕ່າງປະເທດ ໄດ້ມີພິທີມອບ-ຮັບເຄື່ອງຊ່ວຍເຫຼືອລ້າຈາກ ອຳນາດການປົກຄອງແຂວງຫູໜານ (ຫ້ອງການຕ່າງປະເທດ) ແລະ ເຄື່ອງຊ່ວຍເຫຼືອຈາກ ບໍລິສັດ ຊ່ຽເຟິງ ສາກົນ ແຂວງຫູໜານ, ເພື່ອມອບໃຫ້ລັດຖະບານລາວ ນຳໃຊ້ເຂົ້າໃນການປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19 ທີ່ກຳລັງສົ່ງຜົນກະທົບເປັນວົງກວ້າງໃນປັດຈຸບັນ. ເຄື່ອງຊ່ວຍເຫຼືອດັ່ງກ່າວ ປະກອບມີ: ເຄື່ອງວັດແທກອຸນຫະພູມອິນຟາເຣດ ຈຳນວນ 100 ອັນ, ຊຸດປ້ອງກັນການແພດ 80 ຫີບ (ຈຳນວນ 2,000 ຊຸດ) ແລະ ແວ່ນຕາປ້ອງກັນຂອງແພດ 50 ຫີບ (ຈຳນວນ 400 ອັນ).

ຕາງໜ້າຝ່າຍ ສປ ຈີນ ມອບເຄື່ອງຊ່ວຍເຫຼືອໃນຄັ້ງນີ້ ໂດຍ ທ່ານ ຊົ້ງ ເຈຍເຟິງ, ປະທານ ບໍລິສັດ ຊ່ຽງເຟິງ ສາກົນ ແຂວງຫູໜານ, ປະທານກິດຕິມະສັກຖາວອນ ສະພາການຄ້າແຂວງຫູໜານ ປະຈຳລາວ ພ້ອມດ້ວຍຄະນະ ແລະ ຕາງໜ້າຝ່າຍລາວ ຮັບໂດຍ ທ່ານ ໂພໄຊ ໄຂຄຳພິທູນ, ຫົວໜ້າຫ້ອງການກະຊວງການຕ່າງປະເທດ ພ້ອມດ້ວຍຄະນະ, ໂດຍມີຜູ້ຕາງໜ້າຈາກ ກະຊວງສາທາລະນະສຸກ ແລະ ບໍລິສັດ ການບິນລາວ ເຂົ້າຮ່ວມເປັນສັກຂີພະຍານໃນພິທີດັ່ງກ່າວ.

ໃນວັນທີ 14 ມີນາ 2020, ກອງປະຊຸມໃຫຍ່ ຄັ້ງທີ IV ຂອງໜ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ມຽນມາ ໄດ້ໄຂຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ເຮືອງແສງ ຄຳດາລາວົງ, ເລຂາໜ່ວຍພັກສະຖານທູດ, ຊຶ່ງມີບັນດາສະຫາຍສະມາຊິກພັກພາຍໃນໜ່ວຍ ເຂົ້າຮ່ວມ ຈຳນວນ 14 ສະຫາຍ, ຍິງ 01 ສະຫາຍ, ສໍາຮອງ 03 ສະຫາຍ.