ໃນ​ວັນທີ 25 ມີນາ 2017, ສະຖານ​ເອກອັກຄະ​ລັດຖະທູດ ​ແຫ່ງ ສປປ ລາວ ປະ​ຈໍາ ຣາຊະ​ອານາຈັກ ກໍາປູ​ເຈຍ, ​​ໄດ້ເຂົ້າຮ່ວມແຂ່ງຂັນ​ກິ​ລາ​ມິດຕະພາບ ກັບ​ ສະຖານເອກອັກຄະລັດຖະທູດ ສສ. ຫວຽດນາມ ປະຈໍາ ຣາຊະ​ອານາຈັກ ກໍາປູ​ເຈຍ, ທີ່ ສະຖານ​ທູດຫວຽດນາມ, ​ເພື່ອ​ຂໍ່ານັບ​ຮັບ​ຕ້ອນວັນສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ຄົບຮອບ 55 ປີ (1962-2017) ແລະ ວັນເຊັນສົນທິສັນຍາມິດຕະພາບ, ການຮ່ວມມື ແລະ ຄວາມສາມັກຄີແບບພິເສດ ລາວ-ຫວຽດນາມ ຄົບຮອບ 40 ປີ (1977-2017). ເປັນ​ກຽດ​ເຂົ້າ​ຮ່ວມ​ຊົມ​ການ​ແຂ່ງຂັນໃນຄັ້ງນີ້ມີ ທ່ານ THACH DU, ເອກ​ອັກຄະ​ລັດຖະທູດ ວິສາມັນ​ຜູ້​ມີ​ອໍານາດ​ເຕັມ ​ແຫ່ງ ສສ. ຫວຽດນາມ ປະ​ຈໍາ ຣາຊະ​ອານາຈັກ ກໍາປູ​ເຈຍ ແລະ ພັນລະຍາ, ທ່ານ ປຣະສິດ ​ໄຊ​ຍະ​ສິດ, ​ເອກ​ອັກຄະ​ລັດຖະທູດ ວິສາມັນ​ຜູ້​ມີ​ອໍານາດ​ເຕັມ ​ແຫ່ງ ສປປ ລາວ ປະ​ຈໍາ ຣາຊະ​ອານາຈັກ ກໍາປູ​ເຈຍ ແລະ ພັນລະຍາ ​ ພ້ອມ​ດ້ວຍ​ພະນັກງານສະຖານທູດ ​ລາວ-ຫວຽດນາມ ​ແລະ ນັກ​ສຶກສາລາ​ວ​ ເຂົ້າ​ຮ່ວມທັງໝົດ ຈໍານວນ 70 ຄົນ, ​​ໂດຍ​ມີ​ການ​ແຂ່ງຂັນ ​03 ປະ​ເພດກິລາ​ຄື: ກິລາ​ຕີດອກ​ປີກ​ໄກ່, ກິລາເທັນນິດສ໌ ​ແລະ ກິລາ​ປິ່ງ​ປ່ອງ, ​ໂດຍ​ມີ​ການ​ແຂ່ງ​ຂັນ​ຂອງ​ທີ​ມຍິງ, ທີ​ມຊາຍ ແລະ ທິມປະສົມ​​, ການຈັດ​ການ​​ແຂ່ງ​ຂັນ​ກິລາ​ດັ່ງກ່າວ​ ​ເພື່ອ​ເປັນ​ການ​ຮັດແໜ້ນ​ສາຍ​ພົວພັນຮ່ວມ​ມືມິດ​ຕະພາບ ແລະ ຄວາມສາມັກຄີແບບພິເສດຂອງສອງຊາດ ລາວ-ຫວຽດນາມ ກໍຄື ລະຫວ່າງ​ສອງສະຖານທູດ. ການແຂ່ງຂັນ ແມ່ນ​ໄດ້ດຳເນີນໄປດ້ວຍບັນຍາກາດຟົດຟື້ນມ່ວນຊື່ນ ແລະ ຄວາມສາມັກຄີອັນແໜ້ນແຟ້ນ. ພາຍຫຼັງ​ສໍາ​ເລັດ​ການ​ແຂ່ງຂັນ​ ກໍ​ໄດ້​ມີ​ການມອບຂັນ​ລາງວັນເພື່ອເປັນທີ່ລະນຶກ ​ແລະ ຮ່ວມ​ພາ​ເຂົ້າ​ສາມັກຄີ ພ້ອມ​ທັງ​ມ່ວນ​ຊື່ນ​ລໍາວົງສາມັກ​ຄີ​ຮ່ວມ​ກັນ.

ໃນວັນທີ 23 ມີນາ 2017, ທີ່ ກະຊວງການຕ່າງປະເທດ, ສະມາຊິກສະພາ ແຫ່ງຊາດ (ສສຊ) ຊຸດທີ VIII ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ, ນໍາໂດຍ ທ່ານ ນາງ ພອນເພັດ ບຸບຜາ, ຮອງປະທານກໍາມາທິການ ວັດທະນະທຳ-ສັງຄົມ, ສະມາຊິກ ສະພາແຫ່ງຊາດ ຊຸດທີ VIII ປະຈຳເຂດ ເລືອກຕັ້ງທີ 1 ນະຄອນຫຼວງວຽງຈັນ ໄດ້ລົງພົບປະກັບ ພະນັກງານກະຊວງການຕ່າງປະເທດ, ໂດຍມີ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍ ພະນັກງານວິຊາການ ເຂົ້າຮ່ວມຢ່າງພ້ອມພຽງ.ໃນພິທີພົບປະ, ທ່ານ ບຸນເຫຼືອ ພັນດານຸວົງ, ຫົວໜ້າຫ້ອງການການຕ່າງປະເທດ, ໄດ້ຂຶ້ນລາຍງານໂດຍຫຍໍ້ກ່ຽວ ກັບການເຕີບໃຫຍ່ຂະຫຍາຍຕົວຂອງກະຊວງການຕ່າງປະເທດ ຊຶ່ງທ່ານໄດ້ກ່າວວ່າ:ກະຊວງການຕ່າງປະເທດ ແມ່ນອົງການຄຸ້ມຄອງລັດຂັ້ນສູນກາງໃນກົງຈັກຂອງລັດຖະບານ, ຊຶ່ງມີພາລະບົດບາດເປັນເສນາທິການຄົ້ນຄວ້າ ແລະ ນຳສະເໜີແນວທາງນະໂຍບາຍການຕ່າງປະເທດ ຕໍ່ສູນກາງພັກ ແລະ ລັດຖະບານ, ເປັນໃຈກາງໃນການປະສານງານຈັດຕັ້ງປະຕິບັດແນວທາງນະໂຍບາຍການຕ່າງປະເທດຂອງພັກ-ລັດ ຕາມຫຼັການຜ່ານປະຕູດຽວທົ່ວປະເທດ ມີຄວາມຮັບຜິດຊອບໃນການເຄື່ອນໄຫວປະຕິບັດໜ້າທີ່ ແລະ ຂອບເຂດສິດ ໃນການບໍລິຫານຕາມການມອບໝາຍ. ກະຊວງການຕ່າງປະເທດ ປະກອບມີ 1 ຫ້ອງການກະຊວງ, 13 ກົມ, 2 ຫ້ອງການ ແລະ 1 ສະຖາບັນທຽບເທົ່າກົມ, ມີຈຳນວນພະນັກງານທັງໝົດ 1006 ຄົນ; ປະຈຸບັນ, ສປປ ລາວ ໄດ້ສ້າງສາຍພົວພັນການທູດກັບ 139 ປະເທດ, ມີສຳນັກງານຕາງໜ້າການທູດຂອງ ສປປ ລາວ ປະຈຳຢູ່ຕ່າງປະເທດ 39 ແຫ່ງ ( ສະຖານທູດ 26 ແຫ່ງ, ສຳນັກງານຜູ້ຕາງໜ້າຖາວອນ 3 ແຫ່ງ, ກົມສຸນໃຫຍ່ 9 ແຫ່ງ ແລະ ຫ້ອງການກົງສຸນ 1 ແຫ່ງ ).

ໃນວັນທີ 26 ກຸມພາ 2017, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ແຄນເບີລາ, ໄດ້ມີການຈັດງານລ້ຽງຮັບຮອງ ແລະ ການວາງສະແດງຮູບພາບ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງ ລາວ-ອົດສະຕຣາລີ ຄົບຮອບ 65 ປີ, ຊຶ່ງເປັນກຽດເຂົ້າຮ່ວມຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະຜູ້ແທນຂັ້ນສູງຂອງລັດຖະບານ ສປປ ລາວ ທີ່ມາຢ້ຽມຢາມທັດສະນະສຶກສາ ຢູ່ ອົດສະຕຣາລີ ພາຍໃຕ້ໂຄງການຢ້ຽມຢາມພິເສດຂອງປະເທດນີ້. ພ້ອມກັນນັ້ນ ກໍ່ຍັງມີ ທ່ານ Phillip Green, ຫົວໜ້າກົມອາຊີອາຄະເນ-ແຜນດິນໃຫຍ່, ກະຊວງການຕ່າງປະເທດ ແລະ ການຄ້າ, ໃນນາມຕາງໜ້າລັດຖະບານ ອົດສະຕາລີ, ເຈົ້າໜ້າທີ່ຈາກກະຊວງການຕ່າງປະເທດ ແລະ ສຳນັກງານນາຍົກລັດຖະມົນຕີ, ທູຕານຸທູດ, ນັກທຸລະກິດ, ຜູ້ຕາງໜ້າຄະນະກຳມະການສູນກາງແນວລາວສ້າງຊາດ ສປປ ລາວ ປະຈຳ ອົດສະຕາລີ ພ້ອມດ້ວຍຄົນເຊື້ອຊາດລາວ ແລະ ນັກສຶກສາ ທີ່ກຳລັງສຶກສາຢູ່ ປະເທດ ອົດສະຕຣາລີ ເຂົ້າຮ່ວມຈຳນວນເກືອບ 200 ຄົນ.