ເນື່ອງໃນໂອກາດຄົບຮອບ 40 ປີ ການຮັບຮອງເອົາຖະແຫຼງການ ແລະ ແຜນປະຕິບັດງານບູໂນດໄອຣິດ ວ່າດ້ວຍ ການສົ່ງເສີມ ແລະ ການຈັດຕັ້ງປະຕິບັດການຮ່ວມມືດ້ານເຕັກນິກ ລະຫວ່າງປະເທດກໍາລັງພັດທະນາ, ໃນວັນທີ 20-22 ມີນາ 2019 ຜ່ານມາ ອົງການສະຫະປະຊາຊາດ (ສປຊ) ໄດ້ຈັດກອງປະຊຸມລະດັບສູງງອົງການ ສະຫະປະຊາຊາດ (ສປຊ) ວ່າດ້ວຍ ການຮ່ວມມືໃຕ້-ໃຕ້ຫຼືເອີ້ນວ່າ “BAPA+40” ແລະ ກອງປະຊຸມປິ່ນອ້ອມອື່ນໆ ຢູ່ເມືອງບູໂນດໄອຣິດ ປະເທດອັກຊັງຕິນ. ໂດຍມີ ປະມຸກລັດ, ຫົວໜ້າລັດຖະບານ, ປະທານສະມັດຊາໃຫຍ່ອົງການ ສປຊ, ເລຂາທິການໃຫຍ່ອົງການ ສປຊ, ຄະນະຜູ້ແທນຂັ້ນສູງປະເທດສະມາຊິກ ສປຊ, ອົງການເຄືອຄ່າຍສປຊ ແລະ ອົງການຈັດຕັ້ງສາກົນອື່ນໆ ຈາກທົ່ວໂລກເຂົ້າຮ່ວມຢ່າງຫລວງຫຼາຍ.
ຄະນະກຳມາທິການ ລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ໄດ້ດຳເນີນກອງປະຊຸມຄັ້ງທີ 28 ຂອງຕົນຢ່າງສຳເລັດຜົນ, ເຊິ່ງໄດ້ຈັດຂຶ້ນໃນວັນທີ 20-21 ມີນາ 2019 ທີ່ບາງກອກ, ປະເທດໄທ. ກອງປະຊຸມໄດ້ໄຂຂຶ້ນໂດຍການເປັນປະທານຂອງພະນະທ່ານສາດສະດາຈານດຣອຳມາລາພົງສະພິດ, ຜູ້ຕາງໜ້າຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດຂອງໄທແລະທັງເປັນປະທານຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍສິດທິມະນຸດ ປີ 2019.
ໃນຕອນເຊົ້າຂອງວັນທີ 24 ມີນາ 2019, ທີ່ ນະຄອນຫຼວງພະບາງ. ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບ ແລະ ພົບປະສອງຝ່າຍກັບ ທ່ານ ຄົ້ງ ສວນໂຢ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ພ້ອມດ້ວຍຄະນະ, ທີ່ເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນລະຫວ່າງວັນທີ 23-25 ມີນາ 2019, ເພື່ອຜັນຂະຫຍາຍຜົນການ ພົບປະລະຫວ່າງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ຫວັງ ອີ, ທີ່ປຶກສາ ແຫ່ງລັດ ແລະ ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ, ທີ່ນະຄອນຫຼວງວຽງຈັນ ໃນເດືອນທັນວາ 2018 ທີ່ຜ່ານມາ.