ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ​ແລະ ກອງ​ປະ​ຊຸມ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນ​ແບບ​ວົງ​ແຄບ​ກ່ຽວ​ກັບ ແນວ​ຄວາມ​ຄິດອິນ​ໂດ-ປາ​ຊີ​ຟິກ ສະ​ບັບ​ຂອງ​ອາ​ຊຽນ, ໃນ​ລະ​ຫວ່າງວັນ​ທີ 7-8 ມີ​ນາ 2019 ທີ່ ຊຽງ​ລາຍ, ປະ​ເທດ ໄທ.

        ໃນວັນທີ 11 ມີນາ 2019 ຢູ່ທີ່ ກະຊວງການຕ່າງປະເທດ ໄດ້ມີພິທີປະດັບຫລຽນກາມິດຕະພາບ ໃຫ້ແກ່ ທ່ານ ມິໂອ-ຊິນ ຢູນ (Myo-Zin Nyunt), ຮອງຜູ້ຕາງໜ້າອົງການອຸຍນິເຊບ (UNICEF) ປະຈຳ ສປປ ລາວ, ເພື່ອເປັນການຍ້ອງຍໍຊົມເຊີຍຜົນງານ ຂອງຜູ້ກ່ຽວພາຍຫລັງສິ້ນສຸດການປະຕິບັດໜ້າທີ່ຢູ່ ສປປ ລາວ.

​   ໃນຕອນເຊົ້າ ຂອງ​ວັນ​ທີ11 ມີນາ 2019, ສະ​ຖາ​ບັນ​ການ​ຕ່າງປະ​ເທດ, ກົມຈັດຕັ້ງ ແລະ ພະນັກງານ, ກະຊວງການຕ່າງປະເທດ ຮ່ວມກັບ ສະຖາບັນການເມືອງ ແລະ ການປົກຄອງແຫ່ງຊາດ ​ໄດ້​ຈັດ​ພິທີ​ເປີດ ຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ, ຊຸດທີ IV ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ ພາຍໃນ​ກະຊວງ​ການ​ຕ່າງປະ​ເທດ ​ແລະຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ຂື້ນ ຢູ່​ສູນ​ການ​ຮ່ວມ​ມື​ສາ​ກົນ ແລະ ການ​ຝຶກ​ອົບ​ຮົມ (ICTC), ຊຸດຝຶກອົບຮົມດັ່ງກ່າວ ຈະດຳເນີນໄປນັບແຕ່ວັນທີ 11 ມີນາ 2019 ຈົນເຖິງ16 ພຶດສະພາ 2019, ໂດຍມີ ຜູ້ເຂົ້າຮ່ວມທັງ​ໝົດຈໍານວນ 53 ທ່ານ, ຍິງ 17 ທ່ານ.