ໃນຕອນເຊົ້າຂອງວັນທີ 22 ມີນາ 2019, ທີ່ ໂຮງແຮມແລນມາກ, ນະຄອນຫຼວງວຽງຈັນ, ໄດ້ຈັດກອງປະຊຸມເຄືອຂ່າຍຄັງປັນຍາຄັ້ງທີສອງ ຂອງສູນຄົ້ນຄວ້າແມ່ນ້ຳຂອງສາກົນ (The 2nd Global Center for Mekong Studies “GCMS” Think Tank Forum) ພາຍໃຕ້ຫົວຂໍ້: “ເສີມຂະຫຍາຍການຮ່ວມມື ແລະ ການເປັນຄູ່ຮ່ວມມື ເພື່ອກ້າວສູ່ການສ້າງປະຊາຄົມແມ່ນ້ຳຂອງ-ແມ່ນ້ຳລ້ານຊ້າງ ທີ່ມີອະນາຄົດຮ່ວມກັນ (Strengthening Cooperation and Partnership Towards Jointly Building a LM Community of Shared Future)”, ເຊິ່ງກອງປະຊຸມເຄືອຂ່າຍຄັງປັນຍານີ້ໄດ້ຈັດຂຶ້ນທ່າມກາງການຈັດກິດຈະກຳຕ່າງໆ ທີ່ລະນຶກເຖິງການສ້າງຕັ້ງຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ (Mekong-Lancang Cooperation/MLC) ຄົບຮອບ 03 ປີ (2016-2019).
ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ໄດ້ສຳເລັດການເຂົ້າຮ່ວມກອງປະຊຸມເວທີປຶກສາຫາລືລະດັບໂລກ ບາກູ ຄັ້ງທີ VII ພາຍໃຕ້ຫົວຂໍ້"ນະໂຍບາຍການຕ່າງປະເທດໃໝ່ (The 7th Global Baku Forum/ A New Foreign Policy)", ໃນລະຫວ່າງວັນທີ 14-16 ມີນາ 2019, ທີ່ ນະຄອນຫຼວງບາກູ, ປະເທດ ອາເເຊກໄບຈານ.
ໃນວັນທີ 20 ມີນາ 2019, ທີ່ ກະຊວງການຕ່າງປະເທດ, ໄດ້ມີພິທີລົງນາມໃນເອກະສານແລກປ່ຽນໂຄງການຊ່ວຍເຫຼືອ ຈາກ ລັດຖະບານຍີ່ປຸ່ນ ຈໍານວນ 04 ໂຄງການ, ຊຶ່ງຕາງໜ້າຝ່າຍລາວ ຮ່ວມລົງນາມໃນເອກະສານ ແລະ ກ່າວຮັບໂຄງການ ໂດຍ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າຝ່າຍຍີ່ປຸ່ນ ຮ່ວມລົງນາມໃນເອກະສານ ແລະ ກ່າວມອບໂດຍ ໂດຍ ທ່ານ ຕາເກຊິ ຮິກິຮາຣະ(Takeshi HIKIHARA), ເອກອັກຄະລາຊາທູດຍີ່ປຸ່ນປະຈໍາ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງຂອງສອງຝ່າຍ ເຂົ້າຮ່ວມເປັນສັກຂີພະຍານ.