ໃນລະຫວ່າງວັນທີ 27-29 ມີນາ 2019, ກະຊວງການຕ່າງປະເທດ ໄດ້ຈັດກອງປະຊຸມຄົບ​ຄະນະຮັບຜິດຊອບ​ສ້າງຮ່າງກົດໝາຍ ວ່າດ້ວຍ ຊາຍແດນແຫ່ງຊາດທີ່ທ່າລາດ, ແຂວງວຽງຈັນ ໂດຍການ ເປັນປະທານຂອງ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຊຶ່ງ​ມີບັນດາຫົວໜ້າກົມ, ຮອງຫົວໜ້າກົມ ແລະ ວິຊາການທີ່ຮັບຜິດຊອບຈາກ ກະຊວງການຕ່າງປະເທດ, ຫ້ອງວ່າການສູນກາງພັກ, ຄະນະເລຂາທິການສະພາແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ,​​ ກະຊວງຍຸຕິທຳ, ກະຊວງພາຍໃນ, ກະຊວງແຜນການ ແລະ ການລົງທຶນ, ກະຊວງກະສິກຳ ແລະ ປ່າໄມ້, ກະຊວງການເງິນ, ກະຊວງ ໂຍທາທິການ ແລະ ຂົນສົ່ງ, ກະຊວງອຸດສາຫະກຳ ແລະ ການຄ້າ, ກະຊວງແຮງງານ ແລະ ສະຫວັດດີການສັງຄົມ, ສູນກາງແນວລາວສ້າງຊາດເຂົ້າຮ່ວມ ຈຳນວນທັງໝົດ 80 ກວ່າທ່ານ.

        ໃນວັນທີ 29 ມີນາ 2019, ກະຊວງການຕ່າງປະເທດ ໄດ້ຈັດກອງປະຊຸມສະຫລຸບການເຄື່ອນໄຫວວຽກງານ​ກວດກາຂອງຂະແໜງການຕ່າງປະເທດ ປະຈຳປີ 2018 ໂດຍ​ການໃຫ້ກຽດ​ເປັນ​ປະທານ​ຂອງ​ ທ່ານ ນາງ. ຄໍາເພົາ ເອີນທະວັນ, ຄະນະປະຈຳພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດ ເຊິ່ງມີຄະນະ​ພັກ-ຄະນະ​ນຳກະຊວງ, ບັນດາຄະນະກົມ, ຄະນະພະແນກ, ພະນັກງານຫລັກແຫລ່ງ ​ແລະ ລັດຖະກອນພາຍໃນກະຊວງການຕ່າງປະເທດເຂົ້າຮ່ວມ.

     ໃນ​ວັນ​ທີ 28 ມີ​ນາ 2019 ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປ​ະເທດ ທັງ​ເປັນ​ຫົວໜ້າເຈົ້າ​ໜ້າ​ທີ່​ອາ​ວຸ​ໂສອາ​ຊຽນ ຂອງ ສ​ປ​ປ ລາວ ແລະ ທ່ານ ແພັທຣິກ ເມີຟີ, ຮອງ​ຜູ້​ຊ່ວຍ​ລັດ​ຖະ​ມົນ​ຕີ​ກະ​ຊວງກ​ານ​ຕ່າງ​ປະ​ເທດ ສະ​ຫະ​ລັດ ອາ​ເມ​ລິກາ, ໄດ້ເປັນປະທານຮ່ວມກ​ອງ​ປະ​ຊຸມ​ປຶກ​ສາ​ຫາ​ລື ອາ​ຊຽນ-ສະ​ຫະ​ລັດ ຄັ້ງ​ທີ 32 ​ທີ່ ວໍ​ຊິງ​ຕັນ ດີ​ຊີ, ສະ​ຫະ​ລັດ ອາ​ເມ​ລິ​ກາ ໂດຍການເຂົ້າຮ່ວມຂອງທ່ານຮອງເລຂາທິການໃຫຍ່ອາຊຽນ ຝ່າຍການເມືອງ-ຄວາມໝັ້ນຄົງ ແລະ ບັນດາເຈົ້າໜ້າທີ່ອາວຸໂສອາຊຽນ ຂອງປະເທດສະມາຊິກອາຊຽນອື່ນ ຢ່າງພ້ອມພຽງ.