ໃນວັນທີ 04 ກັນຍາ2021 ນີ້, ທີ່​ສູນ​ຝຶກ​ແອບທະຫານ​ແຫ່ງ​ຊາດ​ທີ 4 ສສຫວຽດນາມ​ໄດ້​ມີ​ພິທີ​ປິດການ​ແຂ່ງຂັນກິລາການທະຫານສາກົນ (ARMY GAMES 2021) ໂດຍການເຂົ້າຮ່ວມເປັນປະທານຂອງ ທ່ານພົນ​​ເອກ ຟານ ວັນ ຢາງ, ກຳມະການ​ກົມ​ການ​ເມືອງ​ສູນ​ກາງ​ພັກກອມ​ມູນິດ​ຫວຽດນາມ, ລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ຫວຽດນາມ, ມີ ທ່ານ ພົນ​ໂທ ​ເຈີ​ນ ກວາງ​ເຟືອງ ຮອງ​ປະທານ​ສະພາ​ແຫ່ງ​ຊາດ​ຫວຽດນາມ, ທ່ານ Krivoruchko Alexei Iurievich ຮອງ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ລັດ​ເຊຍ ພ້ອມດ້ວຍຄະນະນຳກະຊວງປ້ອງກັນປະເທດຫວຽດນາມ, ບັນດາທຸຕານຸທູດ, ທີ່ປຶກສາຝ່າຍປ້ອງກັນຊາດຂອງສະຖານທູດຕ່າງປະເທດປະຈຳ ສສ ຫວຽດນາມ , ບັນດາ​ນາຍ​​ແລະ ​ພົນທະຫານ, ບັນດາທີມນັກກິລາທະຫານຈາກ 8 ປະເທດກໍ​ໄດ້ເຂົ້າຮ່ວມຢ່າງ​ພ້ອມພຽງ, ສຳລັບສະຖານທູດລາວປະຈຳຫວຽດນາມກໍມີ ທ່ານ ​ແສງ​ເພັດ ຮຸ່ງ​ບຸນ​ຍວງ, ເອກອັກຄະລັດຖະທູດວິສາມັນຜູ້​ມີ​ອຳນາດ​ເຕັມ​ແຫ່ງສປປລາວ ປະຈຳສສຫວຽດນາມ,ທ່ານ ພັນ​ເອກ​ ວົງ​ໄຊ ອິນທະຄຳ ທີ່​ປຶກສາ​​ຝ່າຍປ້ອງ​ກັນຊາ​ດ ​ພ້ອມ​ຄະນະເຂົ້າຮ່ວມພິທີດັ່ງກ່າວ.

ໃນວັນທີ 31 ສິງຫາ 2021 ນີ້, ທີ່​ ສູນ​ຝຶກ​ແອບທະຫານ​ແຫ່ງ​ຊາດ​ທີ 4 ສສ ຫວຽດນາມ​ ໄດ້​ມີ​ພິທີ​ເປີດ​ການ​ແຂ່ງຂັນກິລາການທະຫານສາກົນ (ARMY GAMES 2021) ໂດຍການເຂົ້າຮ່ວມເປັນປະທານຂອງ ທ່ານ ພົນ​ໂທ ຫງວຽນ ​ເຕີນ ​ເກືອງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ຫວຽດນາມ, ພ້ອມດ້ວຍຄະນະນຳກະຊວງປ້ອງກັນປະເທດຫວຽດນາມ, ບັນດາທຸຕານຸທູດ, ທີ່ປຶກສາຝ່າຍປ້ອງກັນຊາດຂອງສະຖານທູດຕ່າງປະເທດ ປະຈຳ ສສ ຫວຽດນາມ ທີ່ມີທີມກິລາຂອງຕົນເຂົ້າຮ່ວມ, ບັນດາ​ນາຍ​,​ ພົນທະຫານ, ບັນດາທີມນັກກິລາທະຫານຈາກ 8 ປະເທດ ແລະ ກໍາມະການຕັດສິນ ເຂົ້າຮ່ວມຢ່າງພ້ອມພຽງ, ສຳລັບສະຖານທູດລາວ ປະຈຳ ຫວຽດນາມ ກໍມີ ທ່ານ ​ແສງ​ເພັດ ຮຸ່ງ​ບຸນ​ຍວງ, ເອກອັກຄະລັດຖະທູດວິສາມັນຜູ້​ມີ​ອຳນາດ​ເຕັມ ​ແຫ່ງ ສປປ ລາວ ປະຈຳ ສສ ຫວຽດນາມ, ທ່ານ ພັນ​ເອກ​ ວົງ​ໄຊ ອິນທະຄຳ ທີ່​ປຶກສາ​​ຝ່າຍປ້ອງ​ກັນຊາ​ດ ​ພ້ອມ​ຄະນະເຂົ້າຮ່ວມພິທີ.

ໃນວັນທີ 01 ກັນຍາ 2021, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ. ຫວຽດນາມ ພ້ອມຄະນະຈາກສະຖານທູດລາວ ເຂົ້າອວຍພອນ ສະຫາຍ ຫງວຽນ ກວັກ ຢູ້ງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ, ເນື່ອງໃນໂອກາດວັນຊາດຂອງ ສສ ຫວຽດນາມ ຄົບຮອບ 76 ປີ (2/9/1945-2/9/2021).

ໂອກາດນີ້, ສະຫາຍ ແສງເພັດ ຮຸ່ງບຸນຍວງ ​ໄດ້ສະແດງຄວາມຂອບໃຈມາ​ຍັງ ສະຫາຍ ຫງວຽນ ກວັກ ຢຸ້ງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ ທີ່ໄດ້ຍາດເວລາອັນມີຄຸນຄ່າຕ້ອນຮັບຄະນະ, ພ້ອມ​ທັງຮູ້ສຶກເປັນກຽດຢ່າງສູງ ທີ່ໄດ້ນຳພາຄະນະສະຖານທູດ ມາອວຍພອນກະຊວງການຕ່າງປະເທດຫວຽດນາມ ເນື່ອງໃນໂອກາດວັນຊາດ ແຫ່ງ ສສ ຫວຽດນາມ ຄົບຮອບ 76 ປີ.