ໃນທາມກາງບັນຍາກາດທີ່ປວງຊົນລາວທັງຊາດ ພວມເບີກບານມວນຊື່ນ ສະເຫຼີມສະຫລອງ ປີໃໝ່ລາວ ພສ 2559, ສະຖານທູດລາວ ທີ່ໂຕກຽວ, ປະເທດຍີ່ປຸ່ນ, ກໍ່ບໍ່ໄດ້ປະຮີດໃຫ້ໝອງ ບໍ່ໄດ້ປະຄອງໃຫ້ເສົ້າ, ໄດ້ພ້ອມພາກັນຈັດງານສະຫລອງບຸນປີໃໝ່ລາວຂື້ນ ໃນວັນທີ 17 ເມສາ 2015 ຢູ່ໃນໃຈກາງນະຄອນຫລວງໂຕກຽວ, ເມືອງມີນາໂຕກຶ ເຊິ່ງເປັນບ່ອນທີ່ ທຸງຊາດລາວປີວສະບັດຢູ່ເທີງປາຍເສົາ, ໂດຍມີຜູ້ຄົນ 400 ກ່ວາຄົນ ຫລັ່ງໄຫລ່ເຂົ້າມາຮ່ວມງານຢ່າງຄັບຄາໜາແໜ້ນ ເຊິ່ງໃນນັ້ນ ມີທັງພີ່ນ້ອງຊາວລາວ ຢູ່ປະເທດຍີ່ປຸ່ນ, ນັກສຶກສາລາວ ແລະ ຊາວຍີ່ປຸ່ນ.

ໃນວັນທີ 15 ເມສາ 2016, ທ່ານ ສີອາລຸນກອນ ແສງອຸທອນ ໄດ້ເຂົ້າຢື່ນສານຕາຕັ້ງ ຕໍ່ພະນະທ່ານ Tsakhiagiin ELBERDORJ, ປະທານາທິບໍດີມົງໂກລີ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ຄົນໃໝ່ ປະຈໍາມົງໂກລີ, ​ເຊິ່ງພິທີການມອບສານຕາຕັ້ງແມ່ນໄດ້ຈັດຂຶ້ນທີ່ທໍານຽບແຫ່ງລັດຢ່າງສົມກຽດ. ພາຍຫລັງຍື່ນສານຕາຕັ້ງແລ້ວ ທ່ານເອກອັກຄະລັດຖະທູດ ໄດ້ພົບປະກັບ ທ່ານປະທານາທິບໍດີ ຂອງມົງໂກລີ, ​ເຊິ່ງທ່ານເອກອັກະລັດຖະທູດລາວ ກໍ່ໄດ້ສົ່ງຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກ ພະນະທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສປປ ລາວ ເຖິງ ພະນະທ່ານ ປະທານາທິບໍດີ Ts. Elberdorj, ​ແລະ ພະນະທ່ານປະທານາທິບໍດີ ຂອງມົງໂກລີ ກໍ່ໄດ້ສົ່ງຄວາມຢື້ຢາມຖາມຂ່າວ ແລະ ພອນໄຊ ອັນປະເສີດມາຍັງ ປະທານປະເທດເຮົາເຊັ່ນດຽວກັນ.

ຕອນ​ເຊົ້າ​ວັນ​ທີ 31 ມີນາ 2016, ທີ່​ ສຳນັກງານ​ໃຫຍ່ອົງການຮ່ວມມື​ສາກົນ ສ. ​ເກົາຫລີ ( KOICA ), ​ໄດ້ຈັດ​ພິທີ​ສະ​ເຫລີ​ມສະຫລອງ​ວັນ​ສ້າງຕັ້ງອົງການ​ໂກຍ​ກາ ສ. ​ເກົາຫລີຄົບຮອບ 25 ປີ (01/04/1991-01/04/2016)​ ໂດຍ​ມີ​​ປະທານອົງການ​ໂກຍ​ກາ ທ່ານ ກິມ ຢອງ ມົກ (Kim Young-mok) ທ່ານ ລີ ຢອງ ຊູ (Lee Yong–soo), ​ຫົວຫນ້າ​ກົມ​ຮ່ວມ​ມື​ເພື່ອ​ການ​ພັດທະນາ, ກະຊວງ​ການ​ຕ່າງປະ​ເທດ ສ.​ເກົາຫລີ, ບັນດາ​ທູ​ຕາ​ນຸທູດຈາກປະ​ເທດ​ຄູ່​ຮ່ວມ​ພັດທະນາ​ ແລະ ພະນັກງານ​ຈາກ​ໂກຍ​ກາຮວມທັງ​ຫມົດ​ເກືອບ 200 ຄົນ ​ເຂົ້າ​ຮ່ວມ. ພ້ອມ​ດຽວ​ກັນ​ນີ້, ພິທີ​ດັ່ງກ່າວ​ ກໍ​ຍັງເປັນ​ການ​ເລີ່​ມ​ເປີດ​ການຈັດ​ຕັ້ງ​ປະຕິບັດ 17 ​ເປົ້າ​ຫມາຍ ​ແຫ່ງການພັດທະນາ​ແບບ​ຍືນ​ຍົງ (SDGs) ຂອງ ສປຊ ​ແລະ ​ທັງ​ເປັນ​ການ​ເປີດ​ງານ​ວາງສະ​ແດງ​ເຄື່ອງສິນລະປະ ​ແລະ ວັດທະນະທຳຂອງ 3 ປະ​ເທດ​ຄູ່​ຮ່ວມ​ພັດທະນາຄື: ສປປ ລາວ, ກາ​ນາ ​ແລະ ​ປະ​ເທດ ປາຣາ​ໄກວ. ງານ​ວາງສະ​ແດງ​ດັ່ງກ່າວ ​​ແມ່ນ​ເປັນ​ການ​ສົ່ງ​ເສີມແນວ​ຄວາມ​ຄິດຂອງ ສ.​ເກົາຫລີ ຕໍ່​ກັບ​ 5 ​ແຜນການ ການ​ພັດທະນາ​ແບບ​ຍືນ​ຍົງ ທີ່​ຈະ​ເລີ່ມ​ຈັດ​ຕັ້ງ​ປະຕິບັດປີ 2030 ຄື: ​ເພື່ອ​ຊ່ວຍທາງ​ດ້ານ​ການ​ສຶກສາ​ຂອງ​ເດັກນ້ອຍ​ຜູ້ຍິງ; ການ​ພັດທະນາ​ເຂດ​ຊົນນະບົດ; ການຕ້ານ​ພະຍາດ​ຕິດ​ເຊື້ອ; ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ ​ແລະ ​ການ​ປັບປຸງ​ຊີວິດ​ການ​ເປັນ​ຢູ່ຂອງ​ປະຊາຊົນ​ ໂດຍ​ຜ່ານ​ວິທະຍາສາດ ​ແລະ ​ເຕັກ​ໂນ​ໂລ​ຊີ.