ໃນວັນທີ 31 ມີນາ 2016, ທ່ານ ຄອນເພັງ ທຳມະວົງ, ເອກອັກຄະລັດຖະທູດ ຜູ້ມີອຳນາດເຕັມຄົນໃໝ່ ແຫ່ງ ສປປ ລາວ ໄດ້ຢື່ນສານຕາຕັ້ງຕໍ່ ພະນະທ່ານ ດຣ ໂທນີ ຕັນ ເກັງຢຳ , ປະທານາທິບໍດີ ແຫ່ງ ສາທາລະນະລັດ ສິງກະໂປ, ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ສິງກະໂປ ທີ່ມີສຳນັກງານຕັ້ງຢູ່ ສິງກະໂປ. ທ່ານປະທານາທິບໍດີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທູດລາວຄົນໃໝ່ ແລະ ອວຍພອນໃຫ້ປະສົບຜົນສຳເລັດທຸກປະການ ໃນການປະຕິບັດໜ້າທີ່ວຽກງານຂອງຕົນ.
ໃນວັນທີ 19 ມີນາ 2016 ຜ່ານມານີ້, ສະຖານກົງສຸນໃຫຍ່ ສປປ ລາວ ປະຈຳ ຣາຊະອານາຈັກໄທ ທີ່ ຈັງຫວັດຂອນແກ່ນ, ໄດ້ຈັດຕັ້ງພິທີ ການປ່ອນບັດເລືອກຕັ້ງສະມາຊິກ ສະພາແຫ່ງຊາດ ຊຸດທີ VIII ຂຶ້ນຢ່າງເປັນທາງການ ໂດຍການນຳພາຂອງ ທ່ານ ບຸນສີ ວົງບົວສີ, ກົງສຸນໃຫຍ່, ທັງເປັນຫົວໜ້າຄະນະຮັບຜິດຊອບປ່ອນບັດເລືອກຕັ້ງ ພ້ອມດ້ວຍພະນັກງານ ສະຖານກົງສຸນໃຫຍ່ ແລະ ນັກສຶກສາລາວ ຈາກມະຫາວິທະຍາໄລຕ່າງໆຂອງພາກ ອີ່ສານ ຢູ່ພາຍໃຕ້ຄວາມຮັບຜິດຊອບ ຂອງສະຖານກົງສຸນໃຫຍ່ ຈຳນວນ 112 ຄົນ, ຍິງ 34 ຄົນ, ພ້ອມພາກັນຊົມໃຊ້ສິດປະຊາທິປະໄຕຂອງຕົນ ເຂົ້າຮ່ວມການປ່ອນບັັດເລືອກເອົາ ສະມາຊິກສະພາແຫ່ງຊາດ ຊຸດທີ VIII, ດ້ວຍບັນຍາກາດເບີກບານມ່ວນຊື່ນ ແລະ ມີຄວາມຮັບຜິດຊອບສູງ ໂດຍມີໝາກຜົນສຳເລັດລົງດ້ວຍຄວາມເປັນລະບຽບຮຽບຮ້ອຍດີທຸກປະການ.
ໃນວັນທີ 17 ມີນາ 2016, ທ່ານ ຫຸມດາວພອນ ສຸກຂະເສີມ ໄດ້ເຂົ້າຍື່ນສານຕາຕັ້ງຕໍ່ເຈົ້າຊີວິດມາເລເຊຍ, ສົມເດັດລາຊາທິບໍດີ ຢັງດີ ເປີຕວນ ອາກອງ, ຕວນກູ ອັບດຸນ ຮາລິມ, ຢູ່ ພະລາດຊະວັງແຫ່ງຊາດ, ທີ່ ນະຄອນຫຼວງກົວລາລຳເປີ, ເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ມາເລເຊຍ.