ວັນທີ 07 ພະຈິກ 2022, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງນິງບິ່ງ, ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ພົບປະ ແລະ ເຮັດວຽກກັບ ສະຫາຍ ນາງ ຫງວຽນ ທິ ທູ ຮ່າ, ກຳມະການສູນກາງພັກ, ເລຂາພັກແຂວງ, ຊຶ່ງໃນການພົບປະຄັ້ງນີ້ມີ ສະຫາຍ ຟາມ ກວາງ ຫງອກ, ຮອງເລຂາພັກແຂວງປະທານຄະນະກໍາມະການປະຊາຊົນ ແຂວງນິງບິ່ງ, (ເຈົ້າແຂວງ), ມີການນໍາແຂວງເຂົ້າຮ່ວມຢ່າງພ້ອມພຽງ,  ໃນການຕ້ອນຮັບຄັ້ງນີ້ການນຳແຂວງກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງ ທີ່ ສະຫາຍ ເອກອັກຄະລັດຖະທູດ ພ້ອມຄະ ນະ ໄດ້ເດີນທາງໄປຢ້ຽມຢາມ ແລະ ເຮັດວຽກ ຢູ່ ແຂວງ ນິງບິ່ງມີຂຶ້ນທ່າມກາງບັນຍາກາດທີ່ສອງປະເທດ ພວມຈັດຕັ້ງ ກິດຈະກໍາຕ່າງໆເພື່ອພ້ອມກັນສະເຫຼີມສະຫຼອງ “ປີສາມັກຄີມິດຕະພາບ ລາວ-ຫວຽດນາມ 2022” ເພື່ອຫວນຄືນສອງ ວັນປະຫວັດສາດທີ່ສຳຄັນ ຄື: ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ຄົບຮອບ 60 ປີ (05/09/1962-05/09/2022) ​ແລະ ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື ​ລາວ-ຫວຽດນາມ ຄົບຮອບ 45 ປີ (18/07/1977-18/07/2022).

​​

ຕອນບ່າຍຂອງວັນ​ທີ 26 ຕຸລາ 2022, ທ່ານ ຄໍາພັນ ອັ່ນລາວັນ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກໄທ ຕາງໜ້າໃຫ້ ຄອບຄົວ ທ່ານ ດຣ. ບຸນ ວານະສິນ ແລະ ທ່ານ ນ. ຈາຣຸນາ ວານະສິນ, ປະທານບໍລິສັດທົນບູລີເຣວແຄ ກລຸບ ຈໍາກັດ ມະຫາຊົນ ເພື່ອມອບເຄື່ອງຊ່ວຍເຫຼືອບັນເທົາທຸກດ້ານມະນຸດສະທໍາ ໃຫ້ແກ່ ກະຊວງແຮງງານ ແລະ ສະຫວັດດີການສັງຄົມ ນໍາໄປມອບໃຫ້ປະຊາຊົນລາວ ຜູ້ໄດ້ຮັບຜົນກະທົບຈາກໄພພິບັດຕ່າງໆ ໂດຍມີ ທ່ານ ພົງໄຊສັກ ອິນຖາລາດ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເປັນຜູ້ຮັບ, ເຊິ່ງເຄື່ອງຊ່ວຍເຫຼືອດັ່ງກ່າວ ປະກອບດ້ວຍໝີ່ສໍາເລັດຮູບ ມູນຄ່າ 1.200.000 ບາດ, ຢາປົວພະຍາດ ມູນຄ່າ 500.000 ບາດ ແລະ ເງິນສົດ 300.000 ບາດ, ຊຶ່ງມີມູນຄ່າ ທັງໝົດ 2.000.000 ບາດ.

ໃນວັນທີ 18-21 ຕຸລາ 2022, ທີ່ ນະຄອນຫຼວງວຽງຈັນ, ກົມເສດຖະກິດ, ກະຊວງການຕ່າງປະເທດ ໄດ້ເປັນເຈົ້າພາບຈັດກອງປະຊຸມສຳມະນາສາກົນ ໃນຫົວ​ຂໍ້: “  ການ​ແລກປ່ຽນ​ບົດຮຽນ​ ໃນ​ການຈັດ​ຕັ້ງ​ປະຕິບັດ ຂໍ້​ລິ​ເລີ່​ມ ໜື່ງ​​ແລວ ໜຶ່ງ​ເສັ້ນທາງ ຂອງບັນດາປະເທດແມ່ນ້ຳຂອງ-ແມ່ນ້ຳລ້ານຊ້າງ” ໃນຮູບແບບເຊິ່ງໜ້າ ແລະ ທາງໄກ, ໂດຍການເປັນປະທານຂອງ  ທ່ານ ກິ່ງໂພແກ້ວ ພົມມະຫາໄຊ, ຫົວໜ້າກົມເສດຖະກິດ, ກະຊວງການຕ່າງປະເທດ. ກອງປະຊຸມຄັ້ງນີ້ ມີຜູ້ຕາງໜ້າຈາກພາກລັດ ແລະ ພາກທຸລະກິດ ຂອງປະເທດສະມາຊິກແມ່ນໍ້າຂອງ-ແມ່ນ້ຳລ້ານຊ້າງ ຄື: ສປປ ລາວ, ສປ ຈີນ, ກຳປຸເຈຍ, ມຽນມາ, ໄທ ແລະ ສສ. ຫວຽດນາມ ເຂົ້າຮ່ວມ.  ກອງປະຊຸມສໍາມະນາດັ່ງກ່າວ ແມ່ນ​ໄດ້​ຮັບ​ການ​ສະໜັບສະໜູນ​ ຈາກ​ກອງ​ທຶນ​ພິ​ເສດ​ແມ່​ນໍ້າຂອງ-​ແມ່​ນໍ້າລ້ານຊ້າງ.